ရခဲခြင်းလေးပါးအကြောင်းနှင့် လူဖြစ်ရကျိုးနပ်ပြီလား (ဒုတိယပိုင်း)

လူအဖြစ်ကိုရပြီးဖြစ်လို့ လူ့ ဘဝကိုရဖို့ လို့ ခဲယဉ်းခြင်းဆိုတဲ့ နံပါတ်(၁)ရခဲခြင်းတစ်ပါးနဲ့ ပြည့်စုံခြင်းသည်ပင်လျှင် အင်မတန်မှ အတိတ်ကံနှင့်ပြည့်စုံခြင်းဖြစ်ပါတယ်။

၂။ လူ့ဘဝကိုတော့ရနေပေမယ့် အသက်ရှည်ရှည်နေရဖို့ ခဲယဉ်းခြင်းဆိုတဲ့ အချက်ကိုလေ့လာကြည့်ကြဦးစို့။ ဒီအချက်ကလည်းမြတ်စွာဘုရားဟောတော်မူတာ အင်မတန်မှ မှန်ကန်ပါတယ်။ ဘာကြောင့်လဲဆိုတော့ တစ်ချို့ ဆိုရင် အမိဝမ်းထဲမှာပင်သေကြေပျက်စီးနေကြတာတွေ၊ အပြင်ရောက်ရောက်ခြင်းသေဆုံးကြတာတွေ၊ လပိုင်းလေးမျှ အသက်ရှင်ပြီးသေဆုံးကြတာတွေ၊ တစ်နှစ်၊ နှစ်နှစ်အရွယ်ရောက်မှသေကြေပျက်စီးကြတာတွေ စသည်ဖြင့် သက်တန်းတိုတောင်းစွာသေကြတဲ့သူတွေကို ကြည့်မယ်ဆိုရင် ဒီအချက်အလွန်ပင်မှန်ကန်တာ တွေ့ရမှာပါ။ ထိုသို့ သော ပုဂ္ဂိုလ်များထက်စာလျှင် စာဖတ်သူ ဒကာ ဒကာမများမှာ အသက်ရှည်ရှည်နေရတယ်လို့ ပြောလို့ရပါတယ်။ ယခုစာရေးသူ ဦးဇင်းလည်းအသက်အားဖြင့် နှစ်ဆယ်ကျော်ရှိနေပါသောကြောင့် ထိုထိုသို့သော အသက်တန်းတိုတောင်းစွာဖြင့် လူဘဝရဲ့တန်ဘိုးကိုနားမလည်သေးခင် သေကြေပျက်စီးသွားတဲ့ ပုဂ္ဂိုလ်များကိုထောက်ဆကြည့်ရင် အသက်ရှည်ရှည်နေရတယ်လို့ ပြောရပေမယ်။ ခြောက်ဆယ်၊ ခုနစ်ဆယ်၊ ရှစ်ဆယ် အရွယ်ရှိကြသော မိဘအရွယ် အဖွားအရွယ်များကိုထောက်ဆကြည့်ရင်တော့ အသက်ရှည်ပါတယ်လို့ ပြောလို့ မရနိုင်သေးပါ။ မည်သို့ပင်ဖြစ်စေကာမူ လူဘဝတန်ဘိုးကိုသိတတ်နေတဲ့အရွယ်၊ မြတ်စွာဘုရားရှင်၏ အဆုံးမတရားတော်များကို ကောင်းစွာနားလည်နေတဲ့အရွယ် ကောင်းစွာကျင့်ကြံနိုင်တဲ့အရွယ်ဖြစ်လို့ စာဖတ်သူများအနေနှင့်လည်း အသက်ရှည်ရှည်နေရဖို့ ခဲယဉ်းခြင်းဆိုတဲ့ ခဲယဉ်းခြင်းနှင့်လည်းပြည့်စုံနေပါတယ်လို့ ပြောလို့ရပါတယ်။ အင်မတန်မှပင် အတိတ်ကုသိုလ်ကံနှင့်ပြည့်စုံနေပါပြီဟုဆိုရပါမယ်။ နောက်ထပ်အသက်မည်မျှနေရဦးမည်ဆိုတာကိုတော့ ဦးဇင်းတို့တွေခန့်မှန်းလို့မရသေးပါဘူး။ ဒါကြောင့်မြတ်စွာဘုရားရှင်က သတ္တဝါတွေ အသက်ရှည်ရှည်နေရဖို့ခဲယဉ်းတယ်လို့ဟောတော်မူတာပါ။ မှန်လည်းမှန်ကန်လှပါတယ်။ ဒါက နံပါတ်(၂)ဖြစ်တဲ့ အသက်ရှည်ရှည်နေရဖို့ ခဲယဉ်းခြင်းဆိုတဲ့အချက်ကို လေ့လာကြည့်ခြင်းဖြစ်ပါတယ်။

(၃) သူတော်ကောင်းတရားကိုနာကြားရဖို့ ခဲယဉ်းခြင်းဆိုတဲ့အချက်ကိုလေ့လာကြည့်ပါက (သူတော်ကောင်းဆိုတာ မြတ်စွာဘုရားရှင်နဲ့ ရဟန္တာအရှင်မြတ်များ၊ မြတ်စွာဘုရားရဲ့တရားတော်အတိုင်းလိုက်နာကျင့်ကြံနေတဲ့ သံဃာတော်အရှင်မြတ်များ၊ တစ်ခြားတစ်ခြားသော သူတော်စင်ပုဂ္ဂိုလ်များကိုဆိုလိုတာပါ။ တရားဆိုတာကတော့ ထိုထိုသို့ သော မြတ်စွာဘုရားရှင်၊ ရဟန္တာအရှင်မြတ်များနှင့် သံဃာတော်အရှင်မြတ်များ၏ အဆုံးအမ သြဝါဒ ဟောပြောချက်များကိုဆိုလိုတာပါ။) အဲလိုသူတော်ကောင်းတို့၏ အဆုံးအမ သြဝါဒ ဟောပြောချက်များကိုနာကြားရဖို့ ဆိုတာလည်း အင်မတန်မှခဲယဉ်းပါတယ်။ နားလည်လွယ်အောင်ပြောရမယ်ဆိုရင်တော့ မြတ်စွာဘုရားရှင် ဟောပြောတော်မူခဲ့တဲ့တရား ထိုတရားတော်များကို မြတ်စွာဘုရား၏ကိုယ်စား ပြန်လည်ဆုံးမ ဟောပြောတော်မူနေကြတဲ့ တရားဟော ဆရာတော်များရဲ့တရားကို နားကြားရဖို့ ခဲယဉ်းခြင်းပါပဲ။ သံဃာတော်အရှင်မြတ်များက မြတ်စွာဘုရားကိုယ်စားဟောတော်မူနေကြတာပါ။ တကယ်တော့မြတ်စွာဘုရားရဲ့တရားတော်ပါပဲ။ အဲဒီတရားကိုနားကြားရဖို့ခဲယဉ်းပါတယ်။ ဘာလို့ လဲဆိုတော့ မြတ်စွာဘုရားတရားကိုနာယူဖို့ ဆိုတာက ကိုယ်က လူဖြစ်နေဦးမှ၊ လူဖြစ်ပြန်သော်လည်း ဗုဒ္ဓဘာသာဖြစ်နေဦးမှ၊ ဗုဒ္ဓဘာသာဖြစ်နေပြန်သော်လည်း ဘုရား တရား သံဃာတော်တွေကို ဆည်းကပ်ကိုးကွယ်လိုတဲ့ သဒ္ဓါတရားလည်းရှိနေဦးမှ နားကြားခွင့်ရတာပါ။ တိရိစ္ဆာန်ဖြစ်နေရင် နားကြားခွင့်မရပါ။ ဗုဒ္ဓဘာသာ မဟုတ်ပြန်လည်းနာကြားခွင့်မရပါ။ တကယ်နားကြားချင်တဲ့စိတ်ရှိနေဦးမှသာလျှင် နားကြားခွင့်ရမှာပါ။ မိထွေးတော်ဂေါတမီ ဆိုသလိုပေါ့။ မြတ်စွာဘုရားတရားကို ဘုန်းကံကြီးမားသူများသာလျှင် နားကြားခွင့်ရတာပါတဲ့။ ဦးဇင်းတို့မြန်မာပြည်အတိုင်းတာနဲ့ ကြည့်မယ်ဆိုရင် နှစ်စဉ်နှစ်တိုင်း တရားပွဲများ ကျင်းပနေတာဖြစ်သည့်အတွက် တရားနာဖို့ လွယ်ကူတယ်လို့ ထင်ကောင်းထင်ပါလိမ့်မယ်။ ဒါပေမယ့် တစ်ကမ္ဘာလုံးအတိုင်းတာနဲ့ ကြည့်မယ်ဆိုရင်တော့ ဘာမှမပြောပလောက်ပါဘူး။ မြတ်စွာဘုရား သာသနာမရောက်တဲ့နေရာတွေ အပါယ်လေးဘုံသားတွေ ဆိုရင် တရားဆိုတာ ဘာမှန်းမသိပါဘူး။ ဗုဒ္ဓဘာသာဖြစ်လျှက် တရားနာယူချင်တဲ့စိတ်မရှိရင်လည်း ဗုဒ္ဓဘာသာစစ်စစ်ကနေ ဘာသာခြားဖြစ်နေသလိုဖြစ်တတ်ပါတယ်။ အထူးသတိပြုစေချင်ပါတယ်။ တကယ်တော့ မြတ်စွာဘုရားရှင်ရဲ့တရားကို တကယ်ဘုန်းကံကြီးမားသူများသာ နာကြားခွင့်ရကြတာ။ တရားပွဲတွေများတယ်ဆိုပေမယ့် တကယ်နာယူသူကတော့ အင်မတန်နည်းလှပါတယ်။ ထိုထိုသို့သောအချက်များကိုကြည့်မည်ဆိုပါက သူတော်ကောင်းတရားနာကြားရဖို့ ခဲယဉ်းကြောင်းထင်ရှားလှပါတယ်။ နိုင်ငံရပ်ခြားရောက်နေသော ဗုဒ္ဓဘာသာဝင်များအနေနှင့် တရားပွဲတစ်ပွဲပင့်ပြီးပြုလုပ်ဖို့ဆိုတာ အင်မတန်ခဲယဉ်းကြောင်းကို ထောက်ဆမယ်ဆိုရင်လည်းသိနိုင်ပါသေးတယ်။ ဒါကြောင့်မြတ်စွာဘုရားရှင်က သူတော်ကောင်းတရားနာကြားရဖို့ခဲယဉ်းတယ်လို့ ဟောတော်မူတာပါ။ ယခု စာဖတ်သူများအနေနဲ့ ထိုအချက်နှင့်လည်းပြည့်စုံနေတယ်လို့ ဆိုရမှာပါ။ ဘာလို့လဲဆိုတော့ တရားစာတွေဖတ်ရတယ်၊ ပြီးတော့ မိမိကြိုက်နှစ်သက်တဲ့တရားအသံဖိုင်များကို နာယူခွင့်ရနေကြလို့ပါ။ တကယ်နာယူမည်ဆိုပါက ထိုအချက်နှင့်ပြည့်စုံနေပါလိမ့်မယ်။ ထိုအချက်နဲ့ပြည်စုံဖို့ ဆိုတာကလည်း လွယ်ကူတယ်လို့ မထင်လိုက်ပါနဲ့။ အပေါ်ကပြောခဲ့တဲ့အတိုင်းပေါ့လေ။ လူလည်းဖြစ်ဦးမှ ဗုဒ္ဓဘာသာလည်းဖြစ်ဦးမှ တကယ်နာကြားချင်စိတ်လည်းရှိဦးမှ အဲလိုအချက်အလက်နဲ့ပြည့်စုံမှ နာကြားခွင့်ရတာပါ။ စာဖတ်သူများလည်း ထိုသို့ နာယူမှတ်သားနေတာဖြစ်လို့ ထိုအချက်နှင့်ပြည်စုံနေပါတယ်လို့ ယူဆလိုက်ပါတယ်။

(၄)ဘုရားတစ်ဆူဆူပွင့်ဖို့ ခဲယဉ်းခြင်းတယ်တဲ့။ ဘာကြောင့် ဘုရားတစ်ဆူဆူပွင့်ဖို့ခဲယဉ်းတာလည်းဆိုတော့ ဘုရားဖြစ်အောင်ကျင့်ရတဲ့အကျင့်တွေ ပါရမီတွေကများလို့ပါ။ အကျင့်တွေ များသလို ကျင့်ရတဲ့ကာလဟာလည်းအလွန်ပင်ရှည်လျားလှပါတယ်။ ပါရမီတွေက-

၁။ ဒါန – အလှူလှူခြင်း

၂။ သီလ – အကျင့်ကျင့်ခြင်း

၃။ နိက္ခမ – တောထွက်ခြင်း

၎။ ခန္တီ – သည်းခံခြင်း

၅။ အဓိဌာန – ဆောက်တည်ခြင်း

၆။ သစ္စာ – မှန်ကန်စွာဆိုခြင်း

၇။ ဝိရိယ – လုံလထကြွခြင်း

၈။ ပညာ – ဉာဏ်နှင့်ပြည့်စုံခြင်း

၉။ မေတ္တာ – ချစ်ခြင်း

၁၀။ ဥပေက္ခာ – လျစ်လျှူရှုခြင်း- ဟူ၍ ဆယ်ပါးဖြစ်ပါတယ်။

ထိုပါရမီ ဆယ်ပါးတို့ကို အယုတ်၊ အမြတ်၊ အလတ်၊ အမြတ်အားဖြင့် တစ်ပါးပါး၌ သုံးပါး သုံးပါးစီ ပြားပြန်သောကြောင့် ဒသပါရမီ၊ ဒသဥပပါရမီ၊ ဒသပရမတ္ထပါရမီဆိုပြီး ပါရမီဆယ်ပါး အပြားသုံးဆယ်လို့ ပြောရခြင်းဖြစ်ပါတယ်။

မည်သည့် ကမ္ဘာတွင် ပေါ်ထွန်းသော မည်သည့်ဗုဒ္ဓမဆို ထိုပါရမီများကို ဖြည့်ဆည်းမှသာလျှင် ဘုရားဖြစ်ရပါတယ်။ ကျင့်ကြံရတဲ့ ကာလကလည်းမြတ်စွာဘုရားရှင်အပေါ်မူတည်ပြီး ကွဲပြားခြားနားချက်ရှိပါတယ်။ ဆိုလိုတာက ပညာဓိကဘုရား၊ ဦးဇင်းတို့မြတ်စွာရှင်ဆိုလို့ရှိရင် လေးသင်္ချေနှင့်ကမ္ဘာတစ်သိန်း ပါရမီတွေကိုဖြည့်ကျင့်ရတာပါ။ သဒ္ဓါဓိကဘုရား- သဒ္ဓါတရားကိုအကြီးမှူးထားပြီးဘုရားဖြစ်မယ့် ဘုရားရှင်ဟာ ရှစ်သင်္ချေနဲ့ ကမ္ဘာတစ်သိန်းဖြည့်ကျင့်ရပါတယ်။ ဝီရိယာဓိကဘုရား-ဝီရိယကိုအကြီးမှူးထားပြီးဘုရားဖြစ်မယ့် ဘုရားရှင်ဟာ တစ်ဆယ့်ခြောက်သင်္ချေနဲ့ကမ္ဘာတစ်သိန်း ပါရမီများကိုဖြည့်ကျင့်ရပါတယ်။ အဲလို ဖြည့်ကျင့်ရတဲ့ပါရမီတွေ ဖြည့်ကျင့်ရတဲ့ကာလတွေများသည်ဖြစ်လို့  မြတ်စွာဘုရားရှင်က ဘုရားတစ်ဆူဆူဖြစ်ဖို့ခဲယဉ်းတယ်လို့ ဟောတာပါ။ ထိုနံပါတ်(၄)အချက်က ဦးဇင်းတို့ ဗုဒ္ဓဘာသာ ဒကာ ဒကာမများမှာ ပြည့်စုံနေပါတယ်။ မြတ်စွာဘုရားပရိနိဗ္ဗာန်ပြုပြီးဖြစ်သော်လည်း မြတ်စွာဘုရား တရားတော်များဟာ မြတ်စွာဘုရား သက်တော်ထင်ရှားရှိတော်မူသကဲ့သို့ပင် ဖြစ်တယ်လို့ ဟောတော်မူခဲ့တဲ့ ဒေသနာတော်ကိုထောက်ဆကြည့်ရင် ဦးဇင်းတို့ တစ်တွေဟာ မြတ်စွာဘုရားပွင့်တော်မူရာ အခါနှင့်ကြုံကြိုက်နေကြတာပါ။ ဘုရားတစ်ဆူတစ်ဆူပွင့်ဖို့ ခဲယဉ်းလှပါတယ်ဆိုတော့ ဘုရားနှင့်ကြုံဖို့ ခဲယဉ်းတယ်လို့ ပြောလိုတာပါ။ ယခုအနေထားမှာတော့ မြတ်စွာဘုရားနှင့်ကြုံကြိုက်နေတာဖြစ်လို့  နံပါတ်(၄)အချက်နှင့်လည်းပြည့်စုံနေကြပါပြီ။

ရခဲခြင်းလေးပါထဲက တစ်ပါးနှင့်ပြည့်စုံဖို့ တောင် မလွယ်ကူတာပါ။ ဒါပေမယ့် ဦးဇင်းတို့ ဒကာ ဒကာမများက လေးပါးလုံးနှင့်ကိုပြည့်စုံနေကြတာဖြစ်လို့ အတိတ်ကုသိုလ်ကံ အင်မတန်မှပင် ကြီးမားကြောင်းထင်ရှားလှပါတယ်။ ထိုလေးပါးလုံးနှင့်ပြည်စုံနေခိုက်မှာ မေ့လျော့ပေါ့ဆနေမယ်၊ အကုသိုလ်များနှင့် လုံလည်ချာလည်လိုက်မယ်၊ မကောင်းတဲ့ဒုစရိုက်တွေနဲ့ ပျော်မွေ့နေမယ်၊ ကောင်းမှုကုသိုလ်ဘာတစ်ခုမှ မလုပ်ပဲသေသွားမယ်ဆိုရင် အပါယ်လေးပါးရောက်ပြီး လူဖြစ်ရကျိုးမနပ်ပဲဖြစ်နေပါလိမ့်မယ်။ အဲလိုမှမဟုတ်ပဲ စီးပွားရေးကို သမ္မာအာဇီဝကျကျလုပ်ကိုင်တယ်။ ဘုရား တရား သံဃာ မိဘ ဆရာများနှင့်ပတ်သတ်ပြီး ကုသိုလ်အလုပ်တွေလုပ်နေမယ်။ မိမိအောက်ဆင်းရဲနွမ်းပါးသူများကို ကူညီထောက်ပံ့မယ်။ သီလလည်းမြဲမယ်။ အခါအားလျော်စွာ တရားနာခြင်း တရားထိုင်ခြင်းစတဲ့ ကောင်းမှုကုသိုလ်တွေကို အမြဲဝတ်ထားပြီးပြုလုပ်နေမယ်ဆိုရင် ဒီဘဝက စွန့်ခွာသွားရင်တောင် ကောင်းသော ဘုံဌာနများကိုရောက်ပြီး ကောင်းသော ချမ်းသာသော အကျိုးတရားများစွာကိုခံစားကြရမှာပါ။ ယခုလက်ရှိဘဝမှာလည်း လူဖြစ်ရကျိုးနပ်နေကြပြီလို့ဆိုရမှာပါ။ နိဗ္ဗာန်မရသေးလို့ တမလွန်လောက ဟိုဘက်ဘဝကို ရောက်မယ်ဆိုရင်လည်း ကောင်းသော ဘုံဌာနများမှာကျင်လည်ပြီး အဆင့်မြင့် ချမ်းသာများစွာကိုရမှာဖြစ်လို့ စီးပွားရေးကို သမာအာဇီဝကျကျလုပ်ကိုင်တယ်။ ဘုရား တရား သံဃာ မိဘ ဆရာ များနှင့်ပတ်သတ်ပြီး ကုသိုလ်အလုပ်တွေလုပ်နေမယ်။ မိမိအောက်ဆင်းရဲနွမ်းပါးသူများကို ကူညီထောက်ပံ့မယ်။ သီလလည်းမြဲမယ်။ အခါအားလျော်စွာ တရားနာခြင်း တရားထိုင်ခြင်းစတဲ့ကောင်းမှုကုသိုလ်တွေကို အမြဲဝတ်ထားပြီးပြုလုပ်နေတဲ့ပုဂ္ဂိုလ်များဟာ လူဖြစ်ရကျိုးနပ်နေတဲ့ပုဂ္ဂိုလ်များဖြစ်ပါတယ်။ အခုဦးဇင်းပြောတဲ့ အချက်များကိုကြည့်ပြီး "ငါ လူဖြစ်ရကျိုးနပ်ပြီလား"လို့ မိမိကိုယ် မိမိ ပြန်မေးကြည့်ပါ။ လူဖြစ်ရကျိုးမနပ်သေးရင် လူဖြစ်ရကျိုးနပ်လာအောင် လူဖြစ်ရကျိုးနပ်တဲ့ပုဂ္ဂိုလ်များလည်း ဒီထက်မက လူဖြစ်ရကျိုးနပ်အောင် ကျင့်ကြံကြပါလို့တိုက်တွန်းလိုက်ရပါတယ်။ အားလုံးကိုယ်စိတ်နှစ်ပါး ကျန်းမာချမ်းသာကြပါစေ။

အရှင်ဝိမလဝံသ(နာလန္ဒာတက္ကသိုလ်)