မြတ်စွာဘုရားရှင် ဧရကပတ္တနဂါးမင်းကိုဟောထားတဲ့ ဒေသနာတော်လေးတစ်ခုပါ။ အဲဒီမှာ ဘာဟောထားသလဲလို့ဆိုတော့ ရခဲခြင်းတရားလေးပါးဖြစ်ပါတယ်။ ဒီနေရာမှာတစ်ခု သတိပြုရမှာက ရဟန်းတွေ လူပရိတ်သတ်တွေကို ဟောလေ့ရှိတဲ့ ဒုလ္လဘတရား(၅)ပါးနဲ့ မရောမိစေဖို့ပါဘဲ။ ဒုလ္လဘဆိုတာလည်း ရခဲခြင်းဆိုတော့ အဓိပ္ပါယ်က အတူတူပါပဲ။ ဒါပေမယ့် အခုဦးဇင်းပြောချင်တာက တိရိစ္ဆာန်ဖြစ်တဲ့ ဧရကပတ္တနဂါးမင်းကြီးကိုဟောထားတဲ့ ရခဲခြင်းလေးပါးဒေသနာတော်ဖြစ်ပါတယ်။ အဲဒီမှာမြတ်စွာဘုရားက ဘာဟောထားလို့ ဆိုတော့ ၁။လူဘဝကိုရဖို့ ခဲယဉ်းခြင်း။ ၂။လူ့ဘဝရသော်လည်း အသက်ရှည်ရှည်နေထိုင်ရဖို့ ခဲယဉ်းခြင်း။ ၃။သူတော်ကောင်းတရားနာကြားရဖို့ ခဲယဉ်းခြင်း။ ၄။ဘုရားတစ်ဆူဆူပွင့်ဖို့ ခဲယဉ်ခြင်း- ဆိုပြီး ရခဲခြင်းလေးပါးကိုဟောထားတာပါ။ ဒီ...ရခဲခြင်းလေးပါထဲက တစ်ပါးရဖို့ ပင်အင်မတန်မှခဲယဉ်းပါတယ်တဲ့။ လေးပါးလုံးနဲ့ ပြည့်စုံဖို့ ဆိုရင်တော့(အင်မတန့် ) အင်မတန်ခဲယဉ်းပါတယ်လို့ ပြောပြချင်တာပါ။ အဲဒီ(၄)ချက်ကိုသုံးသပ်ကြည့်ကြပါဦးစို့။
(၁)။ လူ့ ဘဝကိုရဖို့ ခဲယဉ်းတယ်ဆိုတဲ့အချက်ပေါ့လေ။ အခု ဦးဇင်းတို့ နေထိုင်တဲ့ ကမ္ဘာလောကကြီးထဲမှာ လူဦးရေ သန်းပေါင်းခြောက်ထောင်ကျော်ကျော်ရှိနေပါတယ်။ လူဘဝရဖို့ ခဲယဉ်းတယ်ဆိုပြီး ဒီလူသားပေါင်းသန်းပေါင်းခြောက်ထောင်ကျော်ကျော် ရှိနေတဲ့အတွက် အလွန်များပြားတဲ့လူဦးရေ အထင်နဲ့  (လူ့ ဘဝ ရဖို့ လို့  မခဲယဉ်းပါဘူး လွယ်ကူပါတယ်လို့)့ ထင်ကောင်းထင်နိုင်ပါတယ်။ အမှန်တော့ တကယ်လူ့ဘဝရဖို့ မလွယ်ကူပါဘူး။ မြတ်စွာဘုရားဟောတော်မူတဲ့ အတိုင်း အမှန်ပင်ရဖို့ဆိုတာ ခဲယဉ်းလှပါတယ်။ ဘာလို့ လဲဆိုတော့ အားလုံးစဉ်းစားကြည့်ပါ။ ဦးဇင်းတို့  ဗုဒ္ဓဘာသာ အယူအရ အပါယ်လေးဘုံဆိုတာရှိပါတယ်။ အဲဒီအပါယ်လေးဘုံထဲက တိရိစ္ဆာန်အရေအတွက်နဲ့ ပဲ နှိုင်းယှဉ်ကြည့်ပါ။ မြေပေါ်ရှိတဲ့တိရိစ္ဆာန် မြေအောက်မှာရှိနေတဲ့ တိရိစ္ဆာန်၊ ရေထဲမှာရှိနေတဲ့ တိရိစ္ဆာန်၊ လေထဲမှာ သွားလာနေကြတဲ့ တိရိစ္ဆာန် အရေအတွက်နဲ့နှိုင်းယှဉ်ကြည့်မယ်ဆိုရင် သိနိုင်ပါတယ်။ တစ်ကမ္ဘာလုံးမှာရှိတဲ့ တိရိစ္ဆာန်အရေအတွက်ကိုထားလိုက်ဦး။ ဦးဇင်းတို့မြန်မာပြည်မှာရှိနေတဲ့တိရိစ္ဆာန် အရေးအတွက်နဲ့ နှိုင်းယှဉ်ကြည့်မယ်ဆိုရင်တောင်မှ လူသားပေါင်းသန်းပေါင်းခြောက်ထောင်ကျော်ကျော်ဆိုတာ မပြောပလောက်တဲ့အရေအတွက်ပါ။ ကျန်တဲ့ ငရဲ၊ ပြိတ္တာ၊ အသုရကာယ်ဆိုတဲ့ အပါယ်ဘုံသားတွေပါထည့်တွက်ပြီး နှိုင်းယှဉ်မည်ဆိုပါက အင်မတန်ပင် လူဦးရေ အရေတွက်နည်းပါးလှကြောင်း သိသာထင်ရှားလှပါတယ်။ မြတ်စွာဘုရားကလည်း နခသိခသုတ်မှာ ရှင်အာနန္ဒာကိုဟောထားတဲ့ ဒေသနာတော်တောင် ရှိနေပါသေးတယ်။ မြတ်စွာဘုရားရှင်က သူ၏လက်သည်းပေါ်မှာ မြေမှုန့် လေးတွေတင်ပြီး "ချစ်သား အာနန္ဒာ ငါဘုရားရဲ့လက်သည်းပေါ်မှာရှိတဲ့ မြေမှုန့် လေးနဲ့  ဒီကမ္ဘာလောကကြီးထဲမှာရှိတဲ့ မြေမှုန့် တွေဘယ်ကများလဲလို့ မေးတော်မူပါတယ်။ ဒီအခါအရှင်အာနန္ဒာက ဘုန်းတော်ကြီးတော်မူသော မြတ်စွာဘုရား အရှင်ဘုရားရဲ့လက်သည်းပေါ်က မြေမှုန့် လေးတွေက ဒီကမ္ဘာလောကကြီးမှာရှိတဲ့ မြေမှုန့်တွေနဲ့ နှိုင်းယှဉ်မယ်ဆိုရင် မပြောပလောက်အောင် နည်းပါပြီး ကမ္ဘာမြေကြီးပေါ်မှာရှိတဲ့ မြေမှုန့် တွေ ရေတွက်မရအောင်များပြားလှပါတယ်လို့ ဖြေပါတယ်။ ဒီအခါမြတ်စွာဘုရားက ချစ်သားအာနန္ဒာ လူလောက မှာရှိတဲ့ လူသားတွေဟာလည်း သေဆုံးပြီး အပါယ်လေးဘုံရောက်တဲ့သူဟာ ကမ္ဘာလောကကြီးမှာရှိတဲ့ မြေမှုန့်တွေလောက်များပြားပြီး လူ့ လောက စတဲ့ ကောင်းတဲ့ဘုံကိုရောက်တဲ့သူတွေကတော့ ငါ့ဘုရားရဲ့လက်သည်းပေါ်မှာရှိတဲ့မြေမှုန့်တွေလောက်ပဲ ရှိတယ်လို့ဟောတော်မူပါတယ်။ "ဒါဖြင့်ရင် ဒီဒေသနာတော်ကိုထောက်ဆကြည့်ရင် လူဘဝကိုရဖို့ အလွန်ပင်ခဲယဉ်းကြောင်းထင်ရှားလှပါတယ်။ သို့ သော် ယခုလက်ရှိ စာဖတ်သူ ဒကာ ဒကာမများအနေနဲ့ လူဘဝရနေကြပြီဖြစ်တဲ့အတွက် နံပါတ်(၁)ရခဲခြင်းတစ်ပါးနဲ့ ပြည့်စုံနေကြပြီဟု ဆိုလို့ ရပါတယ်။ (ဒုတိယပိုင်းဆက်လက်ရေးသားပါမည်။)
အရှင်ဝိမလဝံသ(နာလန္ဒာတက္ကသိုလ်)
No comments:
Post a Comment
Without insight meditation, it is incomplete to be a Buddhist.