ဝေဒနာ ကုန်အောင်ရှု
ဝေဒနာကို ဘယ်လိုရှုမလဲဆိုတာလေး ပြောပေးပါမယ်။ ဝေဒနာ ဘယ်နှစ်မျိုးရှိတယ်လို့ ပြောပြော တူရာပေါင်းလိုက်ရင် ငါးမျိုးပဲ၊ ဒီထဲ ထပ်ချုံးလိုက်ရင် သုံးမျိုးပဲရှိမယ်။ ဒီသုံးမျိုးကို ထပ်ချုံးလိုက်မယ်ဆိုရင်တော့ `ဖြစ်ပျက်ပဲ´ ရှိတယ်လို့ မှတ်ထားလိုက်။
မျက်လုံးဖွင့်လိုက်လို့ မြင်တယ်ဆိုရင် ဥပေက္ခာဝေဒနာပေါ်တာပဲ။ ဖြစ်ပျက်သာ ရှု။ အသံကြားလိုက်တယ်၊ ဥပေက္ခာဝေဒနာ၊ ဖြစ်ပျက်ရှု။ အနံ့နံလိုက်တယ်၊ ဥပေက္ခာဝေဒနာ၊ ဖြစ်ပျက်ရှု။ အစားစားလိုက်တယ်၊ ဥပေက္ခာဝေဒနာ၊ ဖြစ်ပျက်ရှု။ ကိုယ်မှာ ချမ်းသာရင် သုခဝေဒနာ၊ ဖြစ်ပျက်ရှု။ နာတယ် ကျင်တယ် ကိုက်တယ် ခဲတယ်ဆိုရင် ဒုက္ခဝေဒနာ၊ ဖြစ်ပျက်ရှု။ ဒီနေရာမှာပေါ် ဒီနေရာမှာပဲ ပျက်သွားတယ်။ ဒါကြောင့် `သူပေါ်တဲ့နေရာဟာ သူသေတဲ့နေရာပဲ´လို့ မိုးကုတ်ဆရာတော်ဘုရားကြီး မိန့်တော်မူတယ်။ ပေါ်တဲ့အခါမှာလဲ ပြိုင်ပေါ်ရိုးထုံးစံမရှိဘူး။ တစ်ခုပေါ်ခိုက် ကျန်တဲ့ဝေဒနာမပေါ်နိုင်ဘူး။ တစ်ချိန်မှ ဝေဒနာတစ်ခုပဲပေါ်မယ်။ တစ်ခုပေါ်တစ်ခုပျက်၊ ဒါလေး လိုက်ရှုနေရုံပဲ။
အဆင်ပြေ သဘောကျတော့ သောမနဿဝေဒနာ ၀မ်းထဲ (ဟဒယ၀တ္ထု)မှာပေါ်တယ်။ ဒီနေရာမှာ ဉာဏ်လှည့်ပြီး ဖြစ်ပျက်ရှု။ အဆင်မပြေ သဘောမကျတော့ ဒေါမနဿဝေဒနာ ၀မ်းထဲမှာပေါ်တယ်။ ဖြစ်ပျက်ရှု။ ပြေတယ် မပြေတယ်သဘောမထားဘဲ နေတော့ ဥပေက္ခာဝေဒနာ ၀မ်းထဲမှာပေါ်တယ်။ ဖြစ်ပျက်ရှု။ ဒါက ၀မ်းထဲမှာဝေဒနာပေါ်ရင် ရှုဖို့နည်းပဲ။ အပြင်မှာလဲ ရှုစရာမပေါ်၊ ၀မ်းထဲမှာလဲ ရှုစရာမပေါ်ဘူးဆိုရင် အိမ်သည်ဝေဒနာသုံးမျိုး တစ်မျိုးမျိုး စောင့်ရှုပါ။ မရှုမိတဲ့အချိန်သာ ရှိမယ်၊ ဝေဒနာမပေါ်တဲ့အချိန်ဆိုတာမရှိဘူး။
မျက်လုံးမှာ မြင်လာခိုက် ဥပေက္ခာဝေဒနာပေါ်တယ်။ မရှုလိုက်မိရင် သဘောကျတဲ့အာရုံကို မြင်လိုက်ရတော့ ၀မ်းသာတဲ့ သောမနဿဝေဒနာ ၀မ်းထဲမှာပေါ်တယ်။ သဘောမကျတာကို မြင်လိုက်ရတော့ စိတ်ဆင်းရဲတဲ့ ဒေါမနဿဝေဒနာ ၀မ်းထဲမှာ ပေါ်တယ်။ မြင်လိုက်တာကို ကောင်း မကောင်း မခွဲခြားနိုင်လိုက်တော့ ၀မ်းထဲမှာ ဥပေက္ခာဝေဒနာပေါ်တယ်။ မြင်ဆဲ ဥပေက္ခာဝေဒနာကို မိအောင် ရှုနိုင်ရင် ရှု။ မရှုလိုက်မိလို့ သဘောကျတဲ့ သောမနဿဝေဒနာ ၀မ်းထဲမှာ ပေါ်သွားရင်လဲ အဲဒီဝေဒနာ လိုက်ရှု။ မရှုရင် ဝေဒနာပစ္စယာ တဏှာ။ တဏှာလာမယ်။ တဏှာလာရင် ခင်တယ် စွဲလန်းတယ်၊ အားထုတ်တယ်။ ပဋိစ္စသမုပ္ပါဒ်က အလိုလို တန်းသွားတယ်။ မရှုရင် သဘောမကျတော့ ၀မ်းထဲမှာ ဒေါမနဿလာမယ်။ ဝေဒနာပစ္စယာ ဒေါသော။ ဒေါသလိုက်လာတာပဲ။ မရှုလို့ သဘောကျတာလဲ မဟုတ် မကျတာလဲမဟုတ် မြင်လိုက်တာလေးပဲဆိုရင် ၀မ်းထဲမှာ ဥပေက္ခာဝေဒနာ ပေါ်တယ်။ ဥပေက္ခာဝေဒနာပစ္စယာ မောဟော။ မရှုပဲသာ နေလို့ရှိရင် ဝေဒနာပေါ်တိုင်း နောက်က ကိလေသာလိုက်တယ်။ လောဘ၊ ဒေါသ၊ မောဟ ပဋိစ္စသမုပ္ပါဒ်တွေ ဆက်နေတာပဲ။ သုခဝေဒနာပေါ်လဲ ဖြစ်ပျက်ရှု၊ မရှုရင် တဏှာဘက်လှည့်သွားမယ်။ ဒုက္ခဝေဒနာပေါ်လဲ ဖြစ်ပျက်ရှု၊ မရှုရင် ဒေါသဘက်လှည့်သွားမယ်။ ဥပေက္ခာဝေဒနာပေါ်လဲ ဖြစ်ပျက်ရှု၊ မရှုရင် မောဟဘက်လှည့်သွားမယ်။
မြင်တယ်၊ ဥပေက္ခာဝေဒနာ၊ မြင်မြင်ချင်း နားထဲ ဉာဏ်ထည့် ဖြစ်ပျက်ရှု။ ကြားတယ်၊ ဥပေက္ခာဝေဒနာ၊ ကြားကြားချင်း နားထဲ ဉာဏ်ထည့် ဖြစ်ပျက်ရှု။ ရှုလိုက်တော့ ဘာဖြစ်သလဲ။ ဝေဒနာနိရောဓာ တဏှာနိရောဓော။ တဏှာမလာဘဲနဲ့ ချုပ်တယ်။ တဏှာလာရမယ့်နေရာကို ရှုတဲ့ဉာဏ်က အစားထိုးလိုက်တာ။ ဝေဒနာမရှုလိုက်ရင် ဝေဒနာပစ္စယာ တဏှာချည်းဖြစ်နေတယ်။ ရှုလိုက်တော့ တဏှာနေရာကို ဉာဏ်က အစားထိုးယူလိုက်တယ်။ တဏှာသေသွားတယ်၊ လာခွင့်ပေါ်ခွင့်မရတော့ဘူး။ တဏှာမပေါ်တာ နိဗ္ဗာန်ပဲ။ တဏှာတဒင်္ဂသေတော့ တဒင်္ဂနိဗ္ဗာန် ရလိုက်တာ။ မွှေးတယ်၊ မွှေးမွှေးချင်း ဥပေက္ခာဝေဒနာ၊ နားထဲ ဉာဏ်ထည့် ဖြစ်ပျက်ရှု။ စားတယ်၊ စားစားချင်း ဥပေက္ခာဝေဒနာ၊ နားထဲဉာဏ်ထည့် ဖြစ်ပျက်ရှု။ ဝေဒနာနိရောဓာ တဏှာနိရောဓော။ ဖြစ်ပျက်မြင်မှ မဂ်ဝင်မှာ။ ဖြစ်ပျက်မြင်နေရင် တဏှာဝင်ခွင့်မရဘူး။
တိုက်ရိုက်အနေနဲ့ သုခဝေဒနာနောက်က တဏှာလိုက်တယ်။ ဒုက္ခဝေဒနာနောက်က ဒေါသလိုက်တယ်။ ဥပေက္ခာဝေဒနာနောက်က မောဟလိုက်တယ်။ ပဋိစ္စသမုပ္ပါဒ်ဒေသနာတော်အရ ဝေဒနာပစ္စယာ တဏှာပဲ။ ဘယ်ဝေဒနာနောက်ဖြစ်ဖြစ် တဏှာလာတယ်။ ကောင်းတဲ့ သုခဝေဒနာကိုတော့ သာယာလို့ တဏှာလိုက်တယ်။ မကောင်းတဲ့ ဒုက္ခဝေဒနာကိုတော့ မကောင်းတဲ့ဝေဒနာခံစားနေရခိုက် ကောင်းတဲ့ဝေဒနာကို တောင့်တတဲ့တဏှာလာတယ်။ ဥပမာ မကောင်းတာကို စားနေရခိုက် ကောင်းတာကို စားချင်စိတ် ပေါ်တာမျိုးပဲ။ ဆင်းရဲနေခိုက် ဆင်းရဲကနေလွတ်မြောက်လိုတဲ့ တောင့်တစိတ်တဏှာလေးပေါ်တယ်။ ထိုင်တာတော်တော်ကြာလာတော့ ခြေကျင်လာတယ်ဆိုပါစို့။ ဒီခြေကျင်တဲ့ ဒုက္ခဝေဒနာကို ပျောက်လိုစိတ်တဏှာလေး ပေါ်လာတာပဲ။ ဒါကို ဒုက္ခဝေဒနာနောက်က တဏှာလိုက်တယ်လို့ခေါ်တယ်။ ဥပေက္ခာဝေဒနာက အလွန်ငြိမ်သက်တဲ့သဘောရှိတော့ ချမ်းသာတဲ့သဘောပဲ။ သူ့နောက်ကလဲ တဏှာလာတယ်ဆိုတာ ဥပေက္ခာကိုပဲ သဘောကျတဲ့စိတ်ပေါ်လို့ တဏှာလိုက်တာ။ ကောင်းတာ ဆိုးတာ ရွေးမနေဘူး၊ ကြုံသလိုပဲဆိုတော့ အဲလိုလေး စိတ်ထားလိုက်ရတာကို ကျေနပ်နေတာ။ ဒါဟာ ဥပေက္ခာနောက်က တဏှာလိုက်နေတာပဲ။ ဒါကြောင့် ပဋိစ္စသမုပ္ပါဒ်ဒေသနာတော်အရ တိတိကျကျ ပြောရရင်တော့ ဘယ်ဝေဒနာဖြစ်ဖြစ် ဝေဒနာနောက်က တဏှာလိုက်တယ်။
နောက်က ထုံးစံအတိုင်း လိုက်နေတဲ့ တဏှာကို လိုက်ခွင့်မရအောင် မဂ်နဲ့ ရှုပြီးတော့ ဖြတ်ပေးရတယ်။ ဒါမှ တဏှာနိရောဓဖြစ်မယ်။ မရှုဘဲနေရင် ဒီဝေဒနာတွေအလိုပဲ လိုက်နေတော့ ဝေဒနာနောက်က မဂ်ဝင်ခွင့်မရဘူး။ မဂ်ဝင်ရမယ့်နေရာမှာ ကိလေသာတွေချည်း အပြည့်ဝင်နေတယ်။ ကိလေသာအပြည့်နဲ့ပဲ တစ်ဘ၀ နေပြီး တစ်ဘ၀သေသွားရင် နောက်ဘ၀လဲ သေဘေးက ပြေးမလွတ်ဘူး။ ဝေဒနာတွေရှိနေသရွေ့ ဝေဒနာက နှိပ်စက်နေဦးမှာပဲ။ ဝေဒနာက နှိပ်စက်လို့အားရရင် နောက်ဆုံး အသေသတ်ပစ်လိုက်တာ။ ဒါကြောင့် မိုးကုတ်ဆရာတော်ဘုရားကြီးက `ဝေဒနာသုံးခုဟာ သေမင်းပဲ´တဲ့။ ဝေဒနာနှိပ်စက်လို့သေရတာချည်းပဲ။ ဝေဒနာသတ်လို့ သေရတာချည်းပဲ။ ဝေဒနာမခံရဘဲနဲ့ သေတဲ့သူဆိုတာ မရှိဘူး။ ဒါကြောင့် ဝေဒနာကို ကိုယ်က နိုင်အောင်သတ်တဲ့အလေ့အကျင့် လုပ်ထားမှ တော်ကာကျမယ်။ လူတိုင်းမှာ ဝေဒနာရှိတယ်။ ဝေဒနာရှိတာဟာ အကောင်းမဟုတ်ဘူး။ သေမင်းကိုယ်စီရှိနေတာပဲလို့ သဘောပေါက်ထားရမယ်။ ဝေဒနာသေမင်းက မဦးခင် ဉာဏ်က ဦးအောင်လုပ်ထားရမယ်။ ဝေဒနာက ကိုယ့်ကို မသတ်ခင် ကိုယ်က ဝေဒနာကို အရင်ဦးအောင် သတ်ရမယ်။ သူသတ်တာပဲ ဇက်စင်းခံတော့မလား၊ ကိုယ်က သူ့ကို ပြန်သတ်မလား။ ဘ၀များစွာ သံသရာမှာ သူကချည်း သတ်လာခဲ့တာ။ ကိုယ်ကသတ်ရတဲ့အလှည့် တစ်ခါမှ မကြုံခဲ့ဘူး။ ဒီဘ၀တော့ မိုးကုတ်ဆရာတော်လိုမျိုး ဆရာကောင်း သမားကောင်းနဲ့တွေ့လို့၊ ဘုရားသာသနာနဲ့တွေ့လို့ `ဝေဒနာကို ကိုယ်က ပြန်သတ်လို့ရတယ်´ဆိုတဲ့အသိလေး သိခွင့်ရလိုက်တာ၊ တစ်သံသရာလုံးမှာ ဒီအသိလေးကို သိခွင့်မရခဲ့ဘူး။ ဒီတစ်ခါ သတ်ရင်သတ်၊ မသတ်ရင် ဘ၀တိုင်း သူသတ်တာ ခေါင်းစင်းပေးရလိမ့်မယ်။ သတ်တယ်ဆိုတာ ရှုတာကို ပြောတာ။ ဘယ်ဝေဒနာပေါ်ပေါ် ဖြစ်ပျက် ရှုပေးပါ။ ရှုမှ သေမှာ။ ဖြစ်ပျက်မြင်အောင်ရှု။ မြင်ပြီဆိုရင် မုန်းဉာဏ်ဝင်အောင်ရှု။ ဖြစ်တာကလဲ ဒုက္ခသစ္စာ၊ ပျက်တာကလဲ ဒုက္ခသစ္စာ။ သြော်- ဝေဒနာဟာ ဒုက္ခသစ္စာပါလားလို့ ပိုင်ပိုင်နိုင်နိုင် သိလိုက်ရင် နိဗ္ဗာန်ရမယ့် ဉာဏ်တံခါး ပွင့်လာတာပဲ။ ဝေဒနာကို ကိုယ်ကသတ်နိုင်ရင် နိဗ္ဗာန်ရောက်မယ်။ သူကသတ်ရင် သေပွဲဝင်ရလိမ့်မယ်။ တစ်ကြိမ်မက အကြိမ်ကြိမ် ၀င်ရလိမ့်မယ်။ ဒါကြောင့် ဝေဒနာပေါ်တိုင်း ဖြစ်ပျက်မိအောင် ရှု။ မုန်းအောင် ရှု၊ ဆုံးအောင်ရှု။ ဝေဒနာဖြစ်ပျက်ဆုံးသွားတော့ ဝေဒနာနံ ခယာ ဘိက္ခု- ဝေဒနာကုန်သွားတယ်။ ဝေဒနာကုန်ရင် တဏှာကုန်တယ်။ တဏှာကုန်တာဟာ နိဗ္ဗာန်ပဲ။ (ဝေဒနာ ကုန်တယ်ဆိုတာ ဝေဒနာရဲ့ဖြစ်ပျက်အဆုံးကို မြင်တဲ့ဉာဏ်ပေါ်တာကို ဆိုလိုတယ်။ ခန္ဓာရှိနေသရွေ့ ဝေဒနာကတော့ ရှိနေမှာပါ။)
ဒေါက်တာအရှင်ပါရမီ
No comments:
Post a Comment
Without insight meditation, it is incomplete to be a Buddhist.