လမ်းပေါ်က ဖြစ်စဉ်ကို ခေတ္တငေးကြည့်နေဖြစ်ကြတယ်။ စပ်မိစပ်ရာတွေလဲ ပြောဖြစ်ကြတယ်။ ပရာထားကလဲ ပူ၊ နွားနို့ကလဲ ပူတော့ မြန်မြန်လဲ စားလို့ မရ၊ မြန်မြန်လဲ သောက်လို့မရ။ ဒါကြောင့် အချိန်ယူစားနေကြရတာပေါ့။ ဇိမ်ခံစားတာတော့မဟုတ်ပါဘူး။ အာရုံပြီးတာနဲ့ ခရီးဆက်ထွက်ခဲ့ကြတယ်။ လမ်းတွေကလဲ ဘိုပါးမြို့ထဲလောက်သာ ဆိုးတယ်၊ ဒီလမ်းမကြီးတွေကတော့ တော်တော်ကောင်းပါတယ်။ အိစက်ညက်ညော ချောမွေ့လှပါတယ်။
ကားစီးရင်း လမ်းဘေးဝဲယာ ရှုခင်းများကို စိတ်ဝင်တစား ကြည့်ဖြစ်တယ်။ စိမ်းစိုတဲ့ သဘာဝ စိုက်ခင်းများ၊ သဘာဝသစ်ပင်များ၊ သဘာဝတောင်တန်းများ တစ်ရိပ်ရိပ်ရွေ့လျား ဖြစ်ပျက်အလား ပေါ်လိုက်ပျောက်လိုက် ချာလည်လိုက်နေတဲ့ သဘာဝအလှတရားတွေကို ငေးကြည့်နေရသည်မှာလဲ အဓိပ္ပါယ်မဲ့သယောင်ထင်ရပေမယ့် အလွန်ထူးခြားတဲ့ခံစားမှုအသစ်အသစ်တို့ ဖြစ်တည်လို့လာတယ်လေ။ ညို့ညို့မှိုင်းမှိုင်း သစ်ပင်တွေ အုပ်ဆိုင်းနေတဲ့ တောင်ပြာတန်းတွေကို လှမ်းမြင်နေရတဲ့အခါမျိုးမှာ ဒီလိုနေရာလေးတွေမှာ နေလိုက်ရမယ်ဆိုရင် ဘယ်လောက် ပျော်စရာကောင်းလိုက်မလဲ၊ လန်ဆန်းလတ်ဆပ်တဲ့ သဘာဝလေသန့်၊ သဘာဝမြင်ကွင်းတွေကြားမှာ နေလိုက်ရရင်- လို့ အတွေးတစ်ချက်တစ်ချက် ဖြတ်ဖြတ်ဝင်လာခဲ့သေး။ တကယ်နေပါလားဆိုရင်တော့လဲ လွယ်ဘူးထင်တယ်။ ဆန်ချီစေတီကို မရောက်သေးပေမယ့် လမ်းဘေးမှာ မကြာမကြာ ဆန်ချီစေတီမုခ်ဦးပုံသင်္ကေတလေးတွေ ချိတ်ဆွဲထားတာကို တွေ့တွေ့နေရပြီလေ။ ဆန်ချီသင်္ကေတလေးတွေတဲ့။ ရောက်ဖူးတဲ့သူက ပြောတယ်။ ဟုတ်တယ်။ မကြာ မကြာဆိုသလို တွေ့တွေ့နေရတယ်။ သူတို့လဲ ဆန်ချီစေတီကို တော်တော် တန်ဖိုးထားကြတယ်ဆိုတာ သိခွင့်ရလိုက်တာပါပဲ။
ကိုယ်သွားချင်တဲ့ခရီး သွားနေရတဲ့အချိန် ကိုယ်ရောက်လိုရာ မရောက်သေးခင်မှာ ခံစားရတဲ့ပီတိမျိုး၊ စိတ်ချမ်းသာမှုမျိုးတွေ ဖြစ်ခွင့်ရနေတာဟာ ချမ်းမြေ့ကြည်နူးစရာ ဘ၀အရသာခံစားမှုလေးတွေဖြစ်နေတာကြောင့် ဖြစ်ပျက်ရှုပစ်ရမှာတောင် တော်တော်ဝန်လေးနေတယ်လေ။ ရှေ့မှာ အုပ်ဆိုင်းဆိုင်း တောင်ကုန်းတစ်ခု လှမ်းမြင်စပြုနေရပါပြီ။ ဒီတောင်ကုန်းဆီကို အာရုံစိုက်လှမ်းမျှော်ကြည့်နေခိုက် ရိပ်ကနဲ့ဆို လိပ်ခုံးပုံစေတီတော်ကို မြင်လိုက်ရခိုက် ကားသမားက ဟိုမှာ ဆန်ချီစေတီ လှမ်းမြင်နေရပြီတဲ့။ ဆန်ချီအကြောင်း စတင်ကြားဖူးကတည်းက ဖူးချင်နေတဲ့ဆန်ချီ၊ အခု အစပထမ တပ်အပ်မျက်မြင် မရောက်ခင် ကြိုတင်လှမ်းမြော်ဖူးတွေ့လိုက်ရခြင်းပါလား။ ပီတိရဲ့အေးချမ်းမှုနဲ့ သဘာဝတောရိပ်တောင်စွယ်တို့ရဲ့ ငြိမ်းချမ်းမှုပေါင်းစပ်မိခိုက်မှာ စေတီတော်ကို တစ်ချက်တစ်ချက် လှမ်းလှမ်းမြင်လိုက်ရတဲ့ အရသာလေးက စိတ်ကို ကြည်နူးစေနိုင်စွမ်းလှပါတယ်။ တောင်ခြေရောက်တော့ ဆန်ချီအ၀င်လက်မှတ်ဖြတ်ရတယ်။ လက်မှတ်ခ နိုင်ငံခြားသားများဆို တစ်ယောက် (၂၅၀) ရူပီးပေးရတယ်။ အိန္ဒိယနိုင်ငံသားများအတွက်တော့ (၅)ရူပီးတဲ့။ ဂိုက်လုပ်သူက သူ့နည်းသူ့ဟန်နဲ့ လိုကယ်ဈေးနဲ့ လက်မှတ်ဖြတ်လာခဲ့တယ်တဲ့။ တစ်ယောက် (၅)ရူပီးနှုံးပေါ့။ ဒါက ကိုယ်လုပ်ခိုင်းတာမဟုတ်ပါဘူး၊ သူ့သဘောအတိုင်း သူလုပ်လာခဲ့တာဖြစ်တယ်လေ။
တောင်ကုန်းလေးပေါ် ကားနဲ့ တက်လို့ရတယ်။ လက်မှတ်ဖြတ်ပြီးတာနဲ့ တောင်တက်လမ်းကို စတင်တက်ခဲ့ကြပါတယ်။ ကွေ့လိုက် တက်လိုက် ဝေ့ဝေ့၀ိုက်ဝိုက်နဲ့ပဲ တစ်ဖြည်းဖြည်းတောင်ကုန်းပေါ် ဆန်ချီစေတီရှေ့ ဂိတ်ရောက်သွားကြတော့ နံနက် (၉)နာရီခန့်ရှိနေပါပြီ။ ဆန်ချီစေတီလဲ ဖွင့်စအချိန်ပေါ့။ စေတီဝင်းအ၀င်ဂိတ်မှာ လက်မှတ်တွေ စစ်ဆေး၊ အိပ်တွေကို ဖွင့်ပြရတယ်။ အိပ်ထဲမှာလဲ လမ်းတုန်းက စားမကုန်တဲ့ ပလာတာတွေ ပါဆယ်ထုပ်လာတာကို ကြည့်ပြီး ဒါက ဘာလဲတဲ့။ အဲဒါ ပရထားဆိုတော့ ဂိတ်စောင့်က ပြုံးပြုံးကြီးလုပ်နေလေရဲ့။ စေတီတော်ကို အ၀င်အ၀ကနေ လှမ်းမြင်လိုက်ရခိုက်မှာ အားရပါးရ ဓာတ်ပုံတွေ တဖျပ်ဖျပ် ရိုက်ပစ်လိုက်တယ်။ ဓာတ်ပုံဝါသနာပါတာတော့မဟုတ်ဘူး။ မှတ်တမ်းကို မြတ်နိုးတာ။ ကိုယ့်ပုံကို ဓာတ်ပုံရိုက်ရတာ ၀ါသနာမပါဘူး၊ ဒီလို မှတ်တမ်းရိုက်ရတာတော့ ၀ါသနာပါတယ်။ စေတီတော်ရဲ့ ရှေ့တည့်တည့် အ၀င်မုတ်မရောက်မီ ယာဘက်ဘေးမှာ ကျောက်သပိတ်ကြီးတစ်လုံးရှိတယ်။ ကျောက်သားကို ထွင်းထုထားတဲ့ သပိတ်ကြီးပေါ့။ သူတို့ခေတ်က အဲဒီသပိတ်ကြီးထဲ ဆွမ်းတွေ ပေါင်းထည့်ကြဟန်တူပါတယ်။ ဒီသပိတ်ကြီးကိုလဲ မှတ်တမ်းယူခဲ့ပါတယ်။ ထို့နောက် စေတီတော်ကို ပထမဦးဆုံး လက်ယာရစ် တစ်ပတ်ပတ်၍ ဖူးမြော်ကြပါတယ်။ အပြင်ကတစ်ပတ်ပတ်ပြီးတဲ့နောက် အတွင်းဘက်က တစ်ပတ်ပတ်ကြတယ်။ အတွင်းဘက်တစ်ပတ်ပတ်ပြီးတဲ့နောက် အပေါ်ပစ္စယာတက်ပြီး တစ်ပတ်ပတ်ကြပါတယ်။
စေတီတော်မှာ မုတ်တံဦးလေးခုရှိတယ်။ အ၀င်ပေါက်လေးပေါက်ပေါ့။ အဲဒီအ၀င်ပေါက်တွေက အသောက မင်းကြီးလက်ထက်ကရှိခဲ့တာမဟုတ်ဘူးတဲ့။ နောက်မှ ဂုတ္တမင်းများလက်ထက်မှ ထပ်မံတိုးချဲ့ထားတာလို့ပြောတယ်။ ဘုရားဖြစ်တော်စဉ်ဗုဒ္ဓ၀င်များ၊ ဇာတ်တော်များကို သရုပ်ဖော်ထားတဲ့ ပန်းပုပုံများကို ကျောက်သားပေါ်မှာထွင်းထုပြီး မုတ်တွေကို အလှဆင်ထားတာ။ မုတ်လေးခု တစ်ခုနှင့်တစ်ခု အနုပညာလက်ယာများက မတူဘူး။ ဇာတ်တော်များ ဖြစ်စဉ်များမတူဘူး။ သေသေချာချာကြည့်လေ ကြည့်မ၀အောင် ဖြစ်ရလေပါပဲ။ မုတ်ဦးတွေကို ရှေ့ဘက်ကရော နောက်ဘက်ကပါ ပန်းပုအနုပညာလက်ရာများနဲ့ ထွင်းထုထားတဲ့ ရုပ်ကြွများကို ကြည့်ရသည်ကလဲ အရသာတစ်မျိုး။ မုတ်ဦးတည့်တည့်ကနေ အတွင်းဘက်မှာ စေတီနံရံကပ်လျက်ထုထားတဲ့ ကျောက်သားဆင်းတုတော်တစ်ဆူစီ မုတ်ဦးတိုင်းမှာ ရှိတယ်။ အချို့ဆင်းတုတော်များက ပကတိအတိုင်း ရှိနေသေးတယ်။ အချို့ဆင်းတုတော်များကတော့ ဗုဒ္ဓဘာသာမဟုတ်သူများက ချိုးဖဲ့ဖျက်ဆီးထားလို့ ကျိုးပဲ့နေတာတွေ တွေ့ရတယ်။ ပကတိအတိုင်း ရှိနေသေးတဲ့ ဘုရားဆင်းတုတော်တစ်ဆူရှေ့မှာပဲ ကိုယ်တတ်သမျှလေးတွေဆိုပြီး ရှိခိုးလိုက်တယ်။
(ဆက်လက်ဖော်ပြပါမည်)။
ဒေါက်တာအရှင်ပါရမီ
No comments:
Post a Comment
Without insight meditation, it is incomplete to be a Buddhist.